Juniorinnen U23 - Herbst 2014

Veränderige si guet und schlecht.. sie chöi trurig si und im erste Moment frustrierend, aber glichzitig gits eim wieder ä Chance sech neu z orientiere und so ä Ufschwung z erläbe und uf das si mir us!

D Saisonvorbereitig isch nid ohni gsi! Mir hei grad churz nach dr Saison im April äs paar Wuche ä Volleyball-Uszyt gha, ds heisst mir hei i de Trainings äs polysportivs Turnierli gmacht, was üs mega Spass bereitet hett. Nach dere Zyt simer so richtig heiss druf gsi wieder Volley z spile. Fertig plöischlet hett sech dr Cyge dänkt und so heimer grad knallhart mit üsem 1h Sprungchrafttraining ahgfange. Jede Mänti und Mittwuch si mir Fröschli's dür d Haue ghüpft und hei ä ganze See zäme gschwitzt. Sogar ir Summerpouse heimers dürezoge und si bim grösste Rege im Tunnel ga z Sprungchraft mache.

Näbst däm heimer üsi Schwerpunkt uf d Abnahme und ufe Service gleit. Dr Service isch scho längers es Thema und da sech dä würk verbesseret hett, chöi mir plötzlech d Ahspiel nümme so guet abnä, darum heimer o d Abnahme trainiert. Natürlich isch o ds Ahgriffstraining nid z churz cho und mir chöi dank däm dr 4Schritt-Ahlouf im Schlaf.

Im Moment simer no amne neue System, wo mir d Usse-Spielerinne vou und ganz aus Abnahmespilerinne ihsetzte und sech Diagonal somit nume ufe Ahgriff cha konzentriere. Mir si zueversichtlech, dass sech das System wird bewähre. Dür die Veränderige hei sech ou Postione es bizeli vrschobe, aber mir nähme die Herusforderig ah und jede vo üs vrsuecht z Beste uf sire Postion z erreiche.

Die Sache si aui eigetlech positiv und sötte üs witerbringe damit mir üses Saisonziel dr Ufstieg ou erreiche. Ou üses Kader hett sech verändert. Mir hei glücklecherwiis e super Transfer vo Stude gmacht neu isch z Jeli mit drbi und verstärkt üs ir Mitti. Zudem heimer super Nachwuchs, wo üs ungerstützt. Leider isch üses Kader o gschrumpft, denn d Melissa vrpasst d Vorrundi, da sie in Serbie neui brueflechi Erfahrige sammlet und o d Sarah wird ir Rückrundi nid drbi chönne si, da sie ou chli is Usland geit. D Mayra duet sech vou uf ihri Matur konzentriere und hett im Moment ke Kapazität so viu z trainiere, somit isch sie die Saison o nid drbi. Üsi Monsterblockerin, d Aina, hett iri Chance packt und spielt (oder eher bänklet :P) scho die Saison bir 1. Liga in Murte. Viel Glück Aina!

Trotz au dene Veränderige gäbe mir aues, damit mir nöchst Jahr wieder im 1 chöi spile. Ah dere steu no es riiiiise Merci a Cyge, dass er mit üs defür kämpft, das mir das de o erreiche!

Und jitze heissts tötörötötrötörötöröööööööööö.. ATTACKEEEEE!